Tennis

Tennis: Meisies

Ons meisiestennis het mooi gegroei tot ‘n span waarmee daar rekening gehou moet word in die Gauteng-tennisliga, wat privaatskole én staatskole insluit.

Ons spog tans met 4 briljante meisiespelers wat deelneem aan ITF-toernooie en kompeterende TSA-rangordes het. Helpmekaar bied ekstra akademiese ondersteuning aan leerders wat deelneem aan tennis op hierdie vlak.

Helpmekaar se meisiespanne neem ook deel aan van die beste toernooie in Suid Afrika, onder andere die Amanda Coetzer-toernooi, die Gerrie Bremmer-toernooi en die Hilton/ St. Anne’s gemengde dubbels-toernooi.

Juffrou Lenke Kruis is die meisiestennis-organiseerder en vrae kan direk aan haar gerig word.

Tennis: Seuns

Helpmekaar se tennisseuns neem deel aan die Southern Gauteng Boy’s Tennis-liga.  Ons het vyf spanne: Wimbledon, Roland Garros, Flushing Meadows, Rod Laver en Ahoy Rotterdam.  Ons Wimbledon-span (die A-span) neem in die Premier-liga deel. Daar is geen ouderdomsonderskeid tussen senior en junior spelers in hierdie liga nie, dit gaan suiwer oor talent en die mannetjies wil gewoonlik so gou as moontlik hulle mede-spelers uitdaag om sodoende op te skuif op die ranglys.
Flushing Meadows, Rod Laver en Ahoy Rotterdam se wedstryde vind plaas op Maandae en die Wimbledon en Roland Garros sê die die stryd teen hulle opponent op Vrydae aan.

Ons neem jaarliks met ons B-, C- en D-spanne deel aan die Bethlehem-toernooi – ‘n absolute hoogtepunt op die tenniskalender!   Ons A-span speel in April in die St. Stithian’s Easter Festival en in September in die Hilton/St. Anne’s gemengde dubbelstoernooi.  In Maart neem ons deel aan die Senior Interhoër en in Oktober aan die Junior Interhoër.  Ons is ook altyd op die uitkyk vir nuwe toernooie en geleenthede om ons spelers aan bloot te stel.

Ons het werklikwaar baie talent in die skool en daar is gereeld spelers wat provinsiaal deelneem. Helpies se seuns-tennisspelers moet nooit onderskat word as hulle op die baan stap nie.

Juffrou Liezel Bach is die seunstennis-organiseerder en vrae kan direk aan haar gerig word.