Marco van Staden

Hier by die Bruin Reus op die Bult heers ‘n onblusbare gees in elke Helpie se hart. Hier is ‘n plek vir elkeen en elke leerder kry die kans om dit sy/haar plek te maak. Die Helpies pak elke dag met ‘n glimlag aan en dit is vir my ‘n absolute voorreg en seën om deel te wees van hierdie skool.

Ek sien uit om in 2018 voort te bou op die skool se 98-jarige bestaan en glo dat elke Helpie die kans sal aangryp om deel te wees van hierdie nalatenskap. Ek doen ‘n beroep op elke Helpie om sy/haar eie stempel af te druk en dat hul keuses deur die Here gelei sal word. Elke Helpie is die vertoonvenster van Helpmekaar Kollege en daar word met hoë verwagtinge na elkeen gekyk. Nie net om sy/haar beste te doen nie maar om met respek, omgee en empatie op te tree ongeag die resultaat.

Helpies, kom ons kyk hierdie jaar na mekaar met liefde en deernis, kom ons moedig mekaar aan en ondersteun mekaar. Kom ons maak 2018 ‘n onvergeetlike jaar in Helpmekaar se geskiedenisboeke. KOMAAN.

Clara Pretorius

Ek het die voorreg gehad om reeds vir vier jaar deel te wees van Helpmekaar. In hierdie tyd het ek besef dat Helpmekaar meer is as net 'n skool...vir my en al die Helpies rondom my het Helpmekaar soos 'n tweede familie geword.

My droom vir 2018 is dat elke Helpie sy unieke waarde sal besef. God het elkeen van ons anders gemaak en iets spesiaals en uniek in ons geplaas.
Kom ons kyk in hierdie jaar verder as net prestasies en soek na daardie "iets spesiaals" binne-in ons. Kom ons help mekaar om trots te wees op wie ons in ons binneste is, sodat ons saam hard kan werk om elkeen volgens ons eie vermoëns te presteer.
My droom is dat ons in plaas daarvan om ons prestasies met mekaar te vergelyk, sal deel in mekaar se vreugde en ons eie unieke talente sal gebruik om God te verheerlik.

Jou waarde lê nie in jou prestasies of sukses nie, maar in dit wat jy vir die mense om jou beteken. Kom ons dra Henry Ward Beecher se woorde saam met ons in die jaar: "He is the greatest whose strength carries up the most hearts by the attraction of his own. "

Ek sien uit daarna om te sien hoe elke personeellid en kind in hierdie jaar saamstaan as familie en saamwerk om ons bruin reus op die bult nuwe hoogtes te laat bereik.