Jean Slabbert

“Dit is ons Hoof, mnr. König se nuwejaarswens dat elke Helpie sy of haar “wonder” en eiewaarde elke dag van 2019 meer en meer sal besef… Vir my beteken dit dat elkeen van ons wat deel is van die Helpie Ketting, die unieke waarde van onsself en die “wonderwerk” wat daar in elkeen van ons is, sal soek en sal vind in die die nuwe jaar wat voorlê.

Verder beteken dit dat Helpies die nederige eer sal besef dat ons anders en uniek is. Waarom is ons uniek en anders as die res? Nie uit hoogmoed nie – maar omdat ons dinge anders doen - die Helpie way…met Helpie “guts”. Mag elkeen van ons daarna streef om in 2019 die ‘’magic” in ons lewe en menswees op te spoor. Mag hierdie jaar groter as ooit tevore wees – vir ons self, maar ook vir ons skool.

My droom vir 2019 is dat ons met trots ons skool tot verdere hoogtes sal neem. Dat Helpmekaar nog groter en beter drome sal laat realiseer as ooit tevore in die afgelope 98 jaar. By Helpmekaar mag ons maar droom. Droom en leef - want drome word bewaarheid as ons elke dag voluit leef en dit doen waarvoor ons lief is.

Wees bereid om in 2019 kanse te waag, voluit te leef en op te staan vir dit wat julle in glo en vir wie julle is. Dan sal jy die EIE in jouself vind.

Ons dank die Skepper vir 2019. ‘n Nuwe jaar wat die belofte inhou van nuwe geleenthede, om die Skepping te geniet, nuwe menseverhoudings en vriende te maak, die kans om iets nuuts te beleef en altyd ons allerbeste te gee in alles wat ons aanpak! KOMAAN Helpmekaar – mag hierdie ‘n REUSE jaar wees!”

Danielle Brink

“Ek hoop almal het die afgelope vakansie goed uitgerus en dat ons op mekaar kan staatmaak om 2019 met entoesiasme aan te pak. Wanneer mens nuwejaarsvoornemens maak, vra jy gewoonlik die vraag: Wat wil ek graag anders doen in hierdie jaar? Hoe wil ek verbeter? Is daar iets waaraan ek meer aandag moet gee of meer tyd aan moet bestee? Vanoggend is dit goed om dieselfde vrae ook aan onsself as skool te vra.

Ek wil graag ’n antwoord voorstel deur vir ons ’n stukkie uit Korinthiërs te lees wat op my hart is vir hierdie jaar… “En nou, broers en susters, pleit ek by julle in die Naam van ons Here Jesus Christus om eendragtig saam te staan – één in julle oortuigings. Daar mag nie groepvorming onder julle wees nie. Julle moet van harte saamstem in julle denke en in julle visie.” 1 Kor 1:10

Hierdie vers praat van eenheid in die kerk, maar in ons geval, ons skool. ’n Eenheid wat saamstaan en saamstreef na dieselfde einddoel, ’n eenheid waarin ons van dieselfde waardes oortuig is.

Pam Golding, die bekende eiendomsmagnaat het al gesê dat:
“Vreemde ding van iets wat groter as jy self is. Dis nie joune om te besit nie. Dit is hulle s’n om aan te gee. 40 jaar later weet ek dat niks wat die moeite werd is om te hê ooit alleen gemaak word nie.”

Daar is waarde en krag daarin om saam te staan om ’n doel te bereik, om te werk vir iets wat groter is as net jyself. Vrae moet gevra word soos :
• Waaraan wil ons bou?
• Waarin wil ons belê?
• Wat wil ons nalaat vir die wat gaan volg?

My wens vir ons as skool vanjaar is dat die Helpmekaar-eenheidsgevoel nog beter gevestig sal word en dat ons dit sal kan sien, dat dit tasbaar sal wees, in ons manier van omgaan met mekaar, hoe ons opstaan en saamstaan te midde van die wêreld daarbuite. Ek wil basies hê dat ons die Helpmekaar “familie” met alles wat ons het, met volle oorgawe help bou. Klink dit nie goed nie?

Ek wil dus vandag net in elkeen van ons harte ’n begeerte wakker maak om mekaar te wíl ondersteun, vir mekaar te wíl opstaan, ’n tipe familie-gevoel te wíl laat heers op hierdie gronde. Want ek glo dat as ons oë op hierdie doel gerig bly, dat ons voete (aksies) outomaties sal volg. Kom ons, in hierdie 98ste bestaansjaar van ons skool, Helpmekaar Kollege, stel mekaar eerste. Kom ons kyk mekaar in die oë en sê saam, Familie eerste, want dis groter as ek. Saam is ons sterker”.